Dzyudochilarimiz nufuzli turnirni 22 ta medal bilan boshladi

Poytaxtimizdagi "Alpomish" sport majmuasi dzyudo bo'yicha "Tashkent Cadet and Junior Asian Cup" musobaqasiga mezbonlik qilmoqda. Unda Osiyoning turli mamlakatlaridan kelgan 300 nafardan ziyod yosh polvonlar o'zaro raqobatlashmoqda.

Musobaqada vakillarimizdan Xurshid Sultonov, Hushnudbek Burxonov, Sultonbek Qo'ldoshev, Dilafro'z Boltaboeva, Saodat Qoraboeva o'z vazn toifalarida oltin medalga ega chiqqan bo'lsa, Abubakr Sattorov, Muhammadqodir Shodmonov, Muhammadkarim Nosirov, Mohinur Olloberganova, Nargiza Do'stmamatova, Nigina Umrzoqova kumush medal bilan taqdirlandi.

Shuningdek, turnir davomida Abdurahmon Sa'dulloev, Hikmatullo Xolosov, Azamat Sobirov, Adhambek To'ychiev, Ramziddin Norboboev, Dilshod Karimov, Alina Kolyucheva, Kamola Hasanova, Gulmira Xolmurzaeva, Marjona Sa'dullaeva hamda Zuhra Alimova kabi dzyudochilarimiz shohsupaning uchinchi pog'onasidan joy oldi.

Shu tariqa, ilk kungi bellashuvlarda O'zbekiston o'smirlar terma jamoasi 5 ta oltin, 6 ta kumush, 11 ta bronza jami 22 ta medalga ega chiqdi.