Amorim to'liq qo'llab-quvvatlanmoqda

"Manchester Yunayted" bosh murabbiyi Ruben Amorim Evropa ligasi finalida mag'lubiyatga uchraganiga qaramay, iste'foga chiqarilishi xavfi ostida emas.

O'tgan oqshom "Tottenxem"ga 0:1 hisobida mag'lub bo'lganidan so'ng, Amorim o'z ishini tashlab ketmasligini, ammo klub xohlasa, tovonsiz ketishga tayyorligini aytdi.

Ammo klubda bunday istak yo'q. Sky Sports nashri xabariga ko'ra, "Manchester Yunayted" har doim Amorimning tayinlanishiga uzoq muddatli loyiha sifatida qaragan va bitta o'yin Rubenning taqdirini hal qila olmaydi.

Amorimni klub to'liq qo'llab-quvvatlamoqda va bu yozgi transferlar bilan tasdiqlanadi. To'g'ri, "Manchester Yunayted"ning byudjeti finalda g'alaba qozonganidan ancha past bo'ladi.

"Manchester Yunayted" kiyinish xonasi ham Amorimni qo'llab-quvvatlashda davom etmoqda. Bir qancha futbolchilar, jumladan Lyuk Shou va sardor Brunu Fernandesh Ruben "qizil iblislar" uchun to'g'ri odam ekanligiga ishonch bildirishdi.