Mirko Elichich: «Yosh futbolchilar yanada ko'proq ishlashlari kerak»

Proliganing 6-turidan o'rin olgan «Lokomotiv» — «Olimpik» (2:0) uchrashuvidan keyin mehmonlar ustozi Mirko Elichich matbuot anjumanida ishtirok etdi.

"O'yin yaxshi o'tdi. Raqib ko'proq bosim qildi, to'p nazorati ham ular tomonida bo'ldi. Bizga tajriba etishmadi", — deb gap boshladi Elichich.

— Ikkinchi o'tkazilgan golda darvozabon xato qildi. Uchrashuv davomida u yaxshi o'ynagandi, bu xatoga nima sabab bo'ldi deb o'ylaysiz?

— To'g'risi, o'sha golni ko'rmadim, zaxiradan futbolchi tushirishga tayyorlanayotgandim. U yosh posbon, tajriba kam, kontsentratsiya etishmadi. Eng yaxshi darvozabonlar ham xato tufayli gol o'tkazishadi. Futbolda ko'p narsani millisoniyalar hal qiladi. Millisoniyaga kontsentratsiyani yo'qotsang xato qilasan va gol o'tkazib yuborasan.

— 6 ta tur ortda qoldi, «Olimpik» siz kutgan futbolni namoyish etyaptimi?

— Yigitlar o'z vazifalarini bilib olishgan. Albatta yoshlar bilan ishlashda vaqt kerak. 4 oy kam muddat. Yosh futbolchilar yanada ko'proq ishlashlari kerak.