"Real"ning bo'lajak yangi chap qanot futbolchisi 2031 yilgacha mo'ljallangan shartnoma imzolaydi

"Benfika"ning chap qanot himoyachisi Alvaro Karreras tez orada "Real" libosini kiyadi.

"Qirollik klubi" 22 yoshli futbolchi bo'yicha kelishuvga erishishga yaqin turibdi - "Benfika" bunga rozilik bildirish arafasida. ESPN xabariga ko'ra, ispaniyalik futbolchi "qaymoqranglilar" bilan olti yilga, 2031 yilning o'rtalariga qadar shartnoma imzolaydi.

Alvaro Karreras 2017-2020 yillarda "Real" akademiyasida shug'ullangan, shundan so'ng "Manchester Yunayted" tizimiga o'tgan. O'tgan yilning yozida futbolchi "Benfika"ga ko'chib o'tdi va joriy mavsumda 48 ta o'yinda to'rtta gol va beshta golli uzatmani amalga oshirdi. Transfermarkt portali himoyachining narxini 28 mln evroga baholamoqda.