Xabi Alonso “Real”da qanday taktik sxemada harakat qilishi ma'lum bo'ldi

Madridning “Real” klubi bosh murabbiyi bo'lishi kutilayotgan Xabi Alonso Kilian Mbappe va Vinisius Juniordan qanday foydalanish borasida reja tuzib qo'ygan. Bu haqda Cadena SER nashri xabar bergan.

Unga ko'ra, ispaniyalik mutaxassis ikkita hujumchidan iborat taktik sxemadan foydalanishni rejalashtirgan — 5-3-2 yoki 4-4-2.

Mbappe hamda Vinisius asosiy hujum juftligi sifatida ko'rilmoqda. Braziliyalik boshqa bir futbolchi — Rodrigo yozda “qirollik klubi”dan ketishi mumkin. Ayni paytda unga Evropaning ko'plab klublari, xususan, “Manchester Siti” jiddiy qiziqish bildirmoqda. Agar barchasi o'xshasa, Rodrigo boshqa chempionatga o'tadi. Bu holat Alonsoning ishini engillashtiradi.

Ispaniyalik mutaxassisning “Real”dagi faoliyati iyun oyidan boshlanishi kutilmoqda. U klubdan ketayotgan Karlo Anchelotti o'rnini egallaydi. Yaqinda “Bayer” rahbariyati Alonso jamoani tark etishini rasmiy ravishda tasdiqladi.

Eslatib o'tamiz, Anchelotti faoliyatini Braziliya terma jamoasi bosh murabbiyi sifatida davom ettiradi. U Ispaniya chempionatida mavsum yakunlangach, “pentakampeonlar” safida ish boshlaydi.