Mbappe Levandovski bilan farqni oshirib oldi

Madridning "Real" klubi hujumchisi Kilian Mbappe chorshanba oqshomida La Liganing "Malorka"ga qarshi uy uchrashuvida gol urdi. Shu tariqa, frantsiyalik hujumchi to'purarlar poygasida Robert Levandovskidan farqni oshirdi.

Hozirda Mbappe joriy Ispaniya chempionatida 28 ta gol urgan. U to'purarlar poygasida ishonchli etakchilik qilmoqda, chunki ikkinchi o'rindagi Levandovski 25 ta gol urgan.

Xabaringiz bor, Kilian Mbappe uchun bu "Real"dagi debyut mavsum hisoblanadi. O'tgan yozda yulduz hujumchi madridliklar safini to'ldirib, "PSJ"dan erkin agent maqomida ko'chib o'tgandi.

"Real" joriy mavsum Ispaniya chempionatida yana ikkita o'yin o'tkazadi.