Rasman: Maksim Shatskix - "Andijon" bosh murabbiyi!

Xabaringiz bor, "Andijon" klubi bosh murabbiyi lavozimida ishlab kelgan Aleksandr Xomyakov iste'foga chiqqach, uning o'rniga munosib nomzod topish ustuvor vazifaga aylangandi.

Klub matbuot xizmati "Andijon" futbol klubi bosh murabbiyligiga o'zbek futboli afsonalaridan biri - Maksim Shatskix tayinlanganini e'lon qildi. Olib borilgan muzokalar ijobiy yakun topdi va tomonlar kelishuvga erishishdi.

Maksim Aleksandrovich Shatskix
1978 yilning 30 avgust kuni Toshkentda tavallud topgan. Muxlislar uni futbolchi sifatida "Dinamo" Kievdagi yorqin faoliyati orqali juda yaxshi eslashadi.

Maksim Aleksandrovich bunga qadar "Paxtakor" klubi bosh murabbiy sifatida faoliyat olib borib, ushbu jamoani ikki marta O'zbekiston chempionligaga etaklab keldi. Shu kunga qadar esa u "Paxtakor" klubi raisi maslahatchisi sifatida ishlab keldi.

Shatskix murabbiylik faoliyatini 2016 yili boshlagan va dastlab "Dinamo" Kiev U17, so'ngra U19 jamoalarida ishladi.

2017 yilning iyun oyidan 2019 yilning avgustiga qadar "Dinamo" Kiev jamoasida bosh murabbiy Aleksandr Xaskevich bilan birga samarali faoliyat olib bordi. 

2019 yilning dekabr oyidan to 2021 yilning martigacha Rossiyaning "Rotor" (Volgograd) jamoasida yana Xaskevich bilan murabbiylar shtabida mehnat qildi.

2022 yilning yozidan Maksim Aleksandrovichning "Paxtakor"dagi hayoti boshlandi. Avvaliga sport direktori, keyin esa bosh murabbiy sifatidagi yorqin faoliyati bilan yodda qoldi.

Pro litsenziyasiga ega bo'lgan Maksim Aleksandrovich 14 may kunidan "Andijon" jamoasini qabul qilib oladi va uning "Burgutlar" bosh murabbiyi sifatidagi debyut uchrashuvi 17 may kuni safarda "Sho'rtan"ga qarshi uchrashuvga to'g'ri keladi.

"Umid qilamizki, Maksim Shatskixning "Andijon"dagi faoliyati yorqin sahifalarga boy bo'ladi.

Xush kelibsan, Maksim Aleksandrovich!", - deyiladi klub bayonotida.