"Espanol" Kataloniya derbisida chempionlik yo'lagi tashkil qilmaydi

Tez orada "Barselona" muddatidan oldin La Liga g'olibiga aylanishi mumkin. Yakshanba kuni "ko'k-anorranglilar"ning Madridning "Real" klubi ustidan qozongan g'alabasi (4:3) chempionlik masalasini deyarli yopdi - kataloniyaliklar marraga uch tur qolganida "qaymoqranglilar"ni etti ochkoga ortda qoldirmoqda.

14 may kuni "Real" "Malorka" bilan o'ynaydi va madridliklar mag'lubiyatga uchrasa, chempionlik muddatidan oldin "Barselona"ga nasib etadi. Bir kun o'tib Xans-Diter Flik jamoasi "Espanol"ga qarshi maydonga tushadi. Marca xabariga ko'ra, "oq-ko'klar" printsipial raqibga, agar u Kataloniya derbisiga chempionat g'olibi maqomida kelsa, chempionlik yo'lagini taqdim etishi dargumon.