Nevill "Arsenal"ning "PSJ"ga qarshi javob o'yinidagi imkoniyatlarini baholadi

Angliyalik mashhur sobiq futbolchi Gari Nevill Chempionlar ligasi yarim finalidan o'rin olgan "PSJ" va "Arsenal" o'rtasidagi javob uchrashuvi haqida o'z fikrlarini bildirib o'tdi.

Dastlabki o'yinda "kanonirlar" o'z uyida parijliklarga imkoniyatni boy berib qo'ygandi (0:1).

"Arsenal" "Bornmut"ga qarshi eng kuchli tarkib bilan o'ynagani, ammo baribir mag'lubiyatga uchragani xavotirli. Ammo finalga chiqish mumkinligiga chin dildan ishonaman. O'ylaymanki, "Arsenal" Parijga borib, g'alaba qozonishi mumkin. "PSJ"dan uzoq vaqtdan beri Chempionlar Ligasida g'alaba kutishmoqda, jamoa asabiylashishi mumkin. Dastlabki 20 daqiqa juda muhim bo'ladi va bitta gol barchasini o'zgartirib yuborishi mumkin. "Arsenal" uchun bu mavsumni hal qiluvchi o'yin, ko'plab futbolchilar uchun bu faoliyatidagi asosiy voqea bo'ladi," - deya Nevillning so'zlarini keltiradi Arsenal News Channel.